Aktrisa: Ailə dağılırsa, günah hər ikisində olur – FOTO

0 0

Aktrisa Sevinc Əliyeva “Qafqazinfo”ya müsahibə verib.

Həmin müsahibəni sizə təqdim edirik:

– Uzun müddətdir ki, efirlərdən uzaq idiniz. Artıq deyəsən, tilsimi qırmısız. Yeni serialla tamaşaçı qarşısına çıxırsız.

– Öz peşəmə qayıtdım. Serialım ATV-də yayımlanır, “Laləli saray” adlanır.  Digər seriallardan çox fərqlənirik. Aktyor heyətimiz çox böyükdür və səviyyəlidir.  Obrazım Lalənin hekayəsi bir serialın içərisində serial kimi gedəcək. Məncə, fərqlidir budur. Tamaşaçı üçün əvvəlcədən çox şey danışmaq istəmirəm.  Artıq 3 bölümü yayımlanıb.

– Bu qədər fasilənin səbəbi nə idi?

– İlk əkizlərim oldu, onlara baxdım. Uşaqları kiminsə üstünə atıb səhərdən axşama kimi çəkilişdə ola bilməzdim. Yəni bizim işimiz qrafikli deyil. Hər bir zaman çəkiliş ola bilər. İndi onları başa sala bilirəm ki, mən işdə oluram. Həm məktəb, həm də bağçada olurlar. Əkizlərdən sonra yenidən qayıtmaq istədim, ancaq Nihad dünyaya gəldi, ona baxdım. Maşallah, indi onun 4 yaşı var.

– Serialın ilk bölümündə intihara cəhd etdiz. İntihar çıxış yolu, ya acizlikdir?

– Hələ bu harasıdır. Bundan böyük səhnələr var. Bütün çəkiliş qrupu yığılaraq ilk efirə baxdı. Nümayişdən sonra evə qayıdanda böyük oğlum Suat mənə sual verdi: “Mama, sən orada nə qəşəng öldün?” Yəni bu, roldur, işləyirəm. Təəsüflər olsun ki, intihar xəbərlərini oxuyuruq. Ancaq mən real həyatda o vəziyyətə gəlməmişəm. İndi cavan uşaqları maarifləndirmək lazımdır. İntihar çıxış yolu deyil, valideynləri düşünmək lazımdır. Bu yaşa qədər əziyyətlə böyüdüblər. Hər bir problem həll olunur. Bircə ölümə çarə yoxdur. Allah can sağlığı verib. Bir universitet, sevgilidən ayrılmaq üçün özünü öldürmək düzgün deyil. Biz də serialda bunu göstərdik. Atası gəlib qızından üzr istəyir. Serialda çıxış yolunun intihar olmadığını vurğuladıq.

– Sizcə, valideynlər öz övladlarına çox müdaxilə etmir? Onların hər bir addımına nəzarət etmək istəyirlər. Bu, düzgündürmü?

– Valideynlərin gənclərin 18 yaşından sonra həyat tərzinə qarışmaqlarını Avropa ölkələrində görməmişəm. Bildiyim qədər uşaqları azad buraxırlar. Həmin uşaqlara şərait yaradılır, təhsil haqları ayrılır. Həmin insanlar nəticə etibarilə bir yerə gəlib çıxırlar. Məncə, bu, düzgündür. Bizdə isə fərqlidir. Azərbaycanılar istiqanlı və narahatdır. Biz uşağı böyüdüb rahat buraxa bilmirik. Amma valideynlər övladlarına sərbəstlik versə, daha yaxşı olar. Baxın, hərdən görürəm öz övladlarını it, pişik, polislə qorxudurlar. Bunun əleyhinəyəm. Uşaqda qorxu hissi yaratmaq lazım deyil. Uşaq heyvanı sevməlidir. Heyvanlara qarşı sevgi dolu olan insanlara da yaxşı rəftar edəcək, qəddar olmayacaq. Yəni ən azından uşağa sevgini uşaqlıdan öyrətmək lazımdır.

– Bayaq “həll olunmayan problem yoxdur” dediz. Sevinc, siz problemlərinizi özünüz həll edirsiz?

– Öz problemlərimin hamısını özüm həll edirəm. Ancaq deməzdim ki, ciddi bir problemim olur. Həyatdır, sınaqlarla qarşılaşırıq. Çalışmalıyıq ki, problemlərdən üzüağ çıxaq. Hamısı həll olan bir şeydir.

– Tək xanımın üç övladı böyütməyi çətin deyil?

– Mənə çox deyirlər ki, siz tək 3 övlada necə baxırsız? Düzdür, iş və başqa problemlər var. Nəinki Azərbaycanda, bütün dünyada böhran baş verib. Belə deyərdim, uşaqların ataları var. Uşaqlarımın həm maddi, həm də mənəvi olaraq yanındayam. Amma sözsüz ki, onların ataları var, tələblərini yerinə yetirir. Uşaqlarımıza görə çalışırıq ki, hər şeyi yerinə yetirək. Əgər xanımın heç bir yerdən dəstəyi yoxdursa, əlbəttə ki, 3 övladı böyütmək çətin olar. Düzdür, dolandıra biləcək, ancaq indiki zamanda uşaqların tələbləri böyükdür. Televiziyadan gördüyü oyuncaqları filan onlara vermək çox çətindir.

– Bildiyimiz qədəri ilə efirdə olmadığınız müddətdə müxtəlif sahələrdə çalışmısız. Elə deyilmi?

– Bir müddət bu sahədə olmadım. Adama deyərlər ki, bəs uşaqlarına necə baxmısan? Mən hər işi bacarmağa çalışıram. Daha çox kadrarxası çalışmışam. Prodüser, menecer olmuşam. Efirdə görünmürümsə, o demək deyil ki, işləmirəm. Qaş və kirpik studiyasında belə çalışmışam. Oturmaq alınmaz. İllərdir ki, efirlərə çıxmırdım, unudulmuşdum. Bu sahə elədir ki, buraxdınsa, yerini başqası tutur. Sadaladığım peşələrdə çalışsam da, öz sənətim üçün çox darıxırdım. Çəkilişdə özümü balıq suda olan kimi hiss edirəm. Ümid edirəm ki, qayıdışım yaddaqalan olar.

– Şou-biznes elə sahədir ki, bir qədər efirlərdən uzaqlaşan kimi dostlarrn da sayı azalır. Qayıdışdan sonra uzaq gəzən dostlar, tanışlar üzə çıxdı?

– Mən dostluğu çox gözəl bacarıram. Gündə yazışmaq, görüşmək dostluq deyil. Dostluq odur ki, dar günündə yığırsan, sonra həmin vaxtlar yanında olur. Sizə bir misal çəkim. Gözəl aparıcımız Zümrüd Qasımova ilə institut illərində yaxın olmuşuq. O vaxtdan dostluğumuz olub. Hər zaman da yanımda olub. Sözümün canı odur ki, əsl dostlar qalıb. Amma nəyəsə görə dost olanlar var. Efirə qayıdandan sonra üzə çıxdılar. Onların üzünə heç vaxt vurmuram. Özüm üçün nəticə çıxarıram. Yaş keçdikcə insan bir qədər müdrikləşir. Öz tanış və dost çevrəmə diqqət edirəm.

– Şou-biznesdə ideal ailələr barmaqla sayılacaq qədərdir. Buna uzunömürlü ailələri də misal çəkə bilərik. Fuad Əlişov və Sevinc Əliyeva ideal bir cütlük hesab olunurdu. Nə baş verdi? Ayrılığın səbəbi nə oldu?

– Bizdə də şou-biznesdə nümunəvi ailələr var. Deməzdim ki, mənim ailəm şou-biznesdə idi deyə dağıldı. Xeyr, mən Fuadla ailə qurmamışdım ki, ayrılam. Sadəcə olaraq belə oldu, Fuad gözəl bir atadır, biz düşmən deyilik. Biz övladlarımız üçün hər şey etməyə hazırıq. Yəni sözümün canı odur ki, heç kəs ailə qurmur ki, dağılsın. Qismət… Bu mövzuda danışmağı xoşlamıram, danışmıram da…

– Ayırlmış, boşanmış qadına bu ölkədə münasibət necədir?

– Əfsuslar olsun ki, əhalinin bir qismi köhnə fikirli qalıb.  Onlar həyat yoldaşından ayrılan bir xanıma pis baxa bilərlər, söz deyərlər. Heç kəs istəməz öz ailəsi dağılsın. Dağılıbsa, deməli, məsləhət belə imiş. 20 il bir-birilərini döysünlər, dava olsun, uşaqda bu ortamda böyüsün. O da böyüyəndə belə bir ailə quracaq. Bu, düzgün deyil. Mən belə fikirləşirəm. Uşağının xoşbəxt olmağını istəyirsənsə, anasını xoşbəxt etməlisən. Uşağın stressdə yaşamağı düzgün deyil. Düzdür, hardasa məqamlar var, danışa bilmirsən. Ancaq xanıma yoldaşından ayrıldığına görə pis baxmaq qətiyyən düzgün deyil. Ona görə ki, ailəli olub min hərəkətdən çıxanlar var. Həm qadın, həm də kişilər. Amma ayrılan qadın var, mərd və namuslu şəkildə işləyir. Niyə pasportda ştampın olmağına görə pis baxılsın? Bu düşüncə getdikcə azalır. Həm təhsil, həm də xarici kanaldan gələn ab-hava təsir edir.  İnsana bununla qiymət vermək olmaz. Aktrisalar üçün  də çox şey deyirdilər. Mən bu peşə üzrə təhsil almışam, işləyirəm. Peşəm üzrə çalışıram. Aktyor-müğənnilər efirdə olduğuna görə çox şey deyirlər. İnsana insanlığına görə qiymət verməlidirlər. Hər peşənin pisi və yaxşısı var. Xırdalıqlara getsək çox nüanslar var.

– Sevinc Əlişova Sevinc Əliyeva oldu. Özünüz Fuad Əlişovun soyadından imtina etdiz?

– Söhbət imtinadan getmir. Boşanmadan sonra bir proses idi. Soyad qaytarılmaq məsələsi var idi. Mənə dedilər ki, soyadı geri qaytaraq? Yəni bu sənətə Sevinc Əliyeva olaraq gəlmişəm. Hamı deyəcəkdi ki, bu, Fuadın keçmiş yoldaşıdır, gəlin çəkək və s. İstəyirəm ki, öz ad-soyadım kimi bu sənətə gəlim. Sevinc Əliyeva kimi doğulmuşam.  Sözsüz ki, uşaqlar atalarının soyadını daşıyırlar. İnşallah, onlar soyadı növbəti nəslə keçirirlər.

– Bayaq dediz ki, Sevinc Əliyeva kimi sənətə gəlmisiz. Ancaq bunu etiraf etmək lazımdır ki, insanlar sizə Fuad Əlişovun xanımı Sevinc Əlişova kimi tanıyır. Sevinc Əliyeva olsaz da, mətbuat sizi Əlişovun eks-həyat yoldaşı kimi təqdim edir. Bu təqdimat sizi narahat etmir?

– Yox, məni narahat etmir. Bu, həyatımın gözəl, balalarımın dünyaya gələn bir hissəsidir. Sadəcə olaraq özüm kimi sənətdə ad qazanmaq istəyirəm.

– Barışıq olacaq?

– Biz düşmən deyilik ki, barışaq. Fuadla gözəl münasibətimiz var. Sentyabrın 15-i uşaqları birgə məktəbə apardıq. Həyat bizi ayırdı. Səhv nə məndə, nə də onda olub. Səhv hər ikimizdə olub. Bir insan günahkar olmur. Ailə dağılırsa günah hər ikisində olur.

– Uşaqlar necə? Boşanmağınız onların psixologiyasına təsir etdimi?

– Biz ayrılanda uşaqlar balaca idi, çox şeyi hiss etmirdilər. Uzun müddət anamgildə qaldım. Elə bilirdilər ki, nənəgilə gəliblər. Nihad lap balaca idi. O qədər də hiss etmədilər. Sözsüz ki, uşaqların ataları üçün darıxan vaxtları olub. Ataları da işlərindən vaxt edən kimi övladlarını görməyə gəlib. Bacardığı qədər… Uşaqlara biz valideyn kimi ayrıldığımızı hiss etdirməmişik. Mənim uşaqlarım nə birinci, nə də axırıncıdır. Təkcə bizim ailə dağılmayıb ki,..

– Hər şey yaxşı olar. Biz sizin ikinci toyunuza gələrik…Həyatı bilmək olmaz.

– Yox… Mənim toyum daha qurtardı. Fikrim yoxdu. Şəxsi həyata ayıracaq vaxtım yoxdur. Evlə işi güclə çatdırıram. Orta hesabla götürsək 15 il sonra evimdən balalarımın toy sədası gəlsin. Uşaqlar bağçaya getsin, daha sonra məktəb, universitet və s. Baxın, həmin dövrləri qarşıma qoyub ona doğru gedirəm. İndi təhsilin üzərinə düşmüşük. Fuad və mən düşünürük ki, uşaqlara bizdən sonra ancaq təhsil, savad qalacaq.

 – Bir çox reklamlarda çəkilmisiz. Ölkənin ən populyar mobil operatorlarından birinin uzunmüddətli siması olmusuz. Və bildiyimiz qədər sizə bunun müqabilində xeyli qonorar ödəyiblər. Hazırda kirayə yaşayırsız, eviniz yoxdur. Reklamlardan əldə etdiyiniz gəlirləri nə əcəb bir mülkə yatırmamısız?

– Ay Allah, hamısını bilirlər. Deməli, mobil operatorun iki il siması olmuşam. Oradan aldığım pul yarım otağa çatmazdı. Düzdür, o vaxtlar yaxşı pul idi. Şəhərə yaxın olan yerdə ev almaq qeyri-mümkün idi. Birincisi, mənim evim var idi, ailəli idim. O zaman ağlıma gəlməzdi ki, həyat belə çönəcək, hər şey dəyişəcək. Həmin pul uşaqlara, özümə, lazımı yerə xərcləyirdim. Kim bilirdi ki, sabah nələr olacaq.

Elvin Elxan

Nuran Məmmədov

Happy

0 0 %

Sad

0 0 %

Excited

0 0 %

Sleepy

0 0 %

Angry

0 0 %

Surprise

0 0 %