0
0
Ermənistan prezidenti Armen Sarkisyanın Qarabağ müharibəsinə son qoyulması barədə razılaşmadan xəbər olmayıb. O, bu haqda mətbuatdan xəbər tutduğunu deyib.
Xaber.org xəbər verir ki, məlumatı erməni mediası yayıb.
“Mətbuatdan öyrəndim ki, Rusiya və Azərbaycan prezidentləri Qarabağ müharibəsinə son qoymaq üçün bəyanat imzalayıb. Şərtləri də oxudum. Təəssüflər olsun ki, prezident kimi mənimlə bu sənədlə bağlı heç bir məsləhətləşmə və müzakirə aparılmayıb, danışıqlarda iştirak etməmişəm”. Ermənistan prezidentinin bəyanatında belə yazılıb.
“Qarabağ münaqişəsinin həlli dövlət əhəmiyyətli bir məsələdir. Ermənistanın, Qarabağın (işğal edilən Azərbaycan torpağı) və bütün erməni xalqının təhlükəsizliyi və hüquqları ilə bağlı hər hansı bir addım, hərəkət, qərar vermə, xüsusən sənədin imzalanması hərtərəfli məsləhətləşmələr və müzakirələrin mövzusu olmalıdır. Qarabağın və nəticədə erməni xalqının taleyinin yalnız maraqlarımız nəzərə alınaraq milli konsensus əsasında həll edilə biləcəyini vurğulayıram” deyib.
O, qeyd edib ki, mövcud vəziyyətə görə geniş bir kütlənin dərin narahatlığını nəzərə alaraq, gündəmimizdən irəli gələn qərarları ən qısa müddətdə razılaşdırmaq üçün dərhal siyasi məsləhətləşmələrə başlanılmalıdır.
“Prezident kimi bu həlledici anda milli birliyin formalaşmasını hazırkı vəzifəm hesab edirəm. Ümidim budur ki, yaxın on gün ərzində hamımız birlik yaradacağıq və Vətənimizə xidmət edəcəyik”. Prezident yekunlaşdırıb.
Babək Göyüş
